粉雪輕飄

這個早上一場初雪，像開始了冬天的序幕。

係時候休息啦

呢隻馬仔日日見佢行來行去，一星期七日無停過，無假放，連瞓覺都企係度瞓，做馬仔有時真係幾慘。今日終於見佢休息，咁咪幾好。
講起休息，想起另一件事。
當年第一份工入行做報紙，就係入左「Hong Kong Standard」英文虎報。
地址係荔枝角，寫字樓個窗望出去係一間船廠，真係時光飛逝。
當年Production老頂係唐先生，一早退休之後去左加拿大享受人生，真係識嘆。
不過印象最深，應該係當年老總，周融先生。
擦鞋嘢唔講啦，不過對佢印象又真係唔錯。
個陣係幾時？八十年代是也。即係李怡本《七十年代》仲未改名做《九十年代》嘅年代。
之後見到周融，就真係一年老過一年，一年辛苦過一年。
感覺係……點解仲唔退休呢？
所以最近知道佢比港台炒左，講真都未必唔係好事。
老總都應該係時候退休，享受下人生，咪幾好。至於「被退休」嘅因由，唉……算吧啦。個份咁嘅工，做左唔會發達，唔做唔會破產，都無謂計較咁多，做人應該向前看，係咪。

種善因得善果

我知道種瓜得瓜，種豆得豆。
咁種乜野會得惡果呢？唔通係種票？
定係種下禍根得惡果？
人世間善有善報，惡有惡報。若然未報，係時晨未到。
咁究竟種票得乜野？可能得個吉都未定。
回頭是岸，善哉，善哉。

最低工資呢家野

一早一晚行過都見佢好勤力咁整「龍鬚糖」，有時都會買盒食吓，行過都會打招呼，傾兩句咁啦。呢日見佢咁開心，佢話加左人工喎。
其實國內都有最低工資保障。
根據祖國「人力資源和社會保障部」係十月廿五日公佈，截至今年九月底，國內廿一個省份，最低工資平均增幅係21.7%。
幾耐調整最低工資一次？就好似無劃一規定。
不過聽朋友講，以佢老家河南省為例，就規定要同物價指數掛鉤，而且每兩年最小要調整一次。
同物價指數掛鉤？每兩年最小要調整一次？聽落幾好喎，唔知特區得唔得呢？你問我，就最好調整吓啦。
香港「堅尼系數」真係世界名列前茅架。

一次唔夠仲尼多次

我知。孔子名丘，字仲尼。
不過上次個「孔子和平奬」已經好＿＿（請填上適當形容詞）。
今年仲尼多次，唔好啦掛。
其實搵孔子做和平奬都已經好作反啦。
偉大的毛主席明明教過。
毌忘階級鬥爭，三反五反，批林批孔，打倒孔家店。
而家竟然光天化日之下，明目張膽整個「孔子」和平奬，仲唔係作反？
而且今年得奬者係……鵝羅私「普驚」。
問你驚唔驚？你驚，我都驚，驚過飲「竹葉青」。
咁你估到時「普驚」會唔會尼攞奬？定係擺張空櫈代表佢呢？
如過你有興趣，有時間。可以係下個月九號，去北京東單新聞大厦個頒奬典禮度睇吓呢單新聞。
希望到時有人會建議個奬改名叫「雷鋒和平奬」。
大家一齊學習雷鋒，咁咪仲好。

真係選人利己

區議會選完啦，賽果都無乜驚喜。
有人上左榜，有人無左影，就係咁簡單。
行出泥叫人投票選你，為乜先?
投票選舉呢家野，不嬲都係「選人利己」架啦。
講所謂民主理想大原則，坐係井底扮佔領道德高地。
無「媽劇」架啦。
一眾「飯民」真係要好好反醒吓。

由十一月六號開始

都話世事無常。
老友Denzel忽然話封鏡收筆唔寫blog，唔怪之佢尋日話「曲終人散後，剩下這個『平遙大戲堂』見證這段歷史。」
識佢咁耐知佢性格，都無問點解。

不過我問咗一句「你唔寫，不如個blog比我寫啦好唔好?」
「你鍾意咪寫囉，不過個blog無人睇架喎。」
「無人睇仲好，鍾意寫乜就寫乜。」
「咁你記得換咗我張相同個名就得啦。」
就係咁，我就接收左佢個blog。
我名叫「梁茶」。

不過話時話，第一次寫blog喎，寫咩好呢。
今日係十一月六日，區議會選舉，講區議會?
政治呢家野我唔識架喎，不過亦都無興趣。
淨係記得呢排行落街，成日都見到平日好少見個位議員行來行去。之前見佢目口目面，呢排就春風滿面咁款。
仲有一個唔知乜水，無端端空降呢區，又好熱情咁話會關心我地呢區發展。三唔識七就叫我支持你，又話係我地街坊好朋友。唉，有睇過「警訊」都唔會啋你啦。
唔通真係好似西人咁講「A friend in need, a friend indeed」。

遺城三十

當年慈禧流落山西，無所事事。
所以在這裡建了一個戲院，供消閒之用。
曲終人散，剩下這個「平遙大戲堂」見證這段歷史。

遺城廿九

這裡的九龍壁跟北京那一塊一模一樣。
當年八國聯軍攻入京城，慈禧太后避走山西，就是住在這古城內，現在還可以看到不少跟慈禧有關的古蹟。
八國聯軍那段歷史，應該沒多少人記得吧。